Vulesse sentì 'o suon' 'e na campana
ca stesse appesa ncielo
e ca sunasse appiessa
senza nu sacrestano
ca tirasse
e mullasse
na funa longa 'a sott' 'o campanile
cumme si fosse Dio c' 'a fa' sunà.
Vulesse sentì 'o suon' 'e sta campana
grossa e pesante,
'e bbronzo,
e ca sunasse appiessa,
mmiez' 'e nnuvole,
ognettanto na vota,
no tutt' 'e mmatine
o quann'è ffesta
o quanno ll'ommo mòre
ma sulo quanno 'a vita
e tutt' 'e ccose storte 'e chistu munno
t'hanno fatto perdere 'a fede.
[1983]
Da 'O penziero e altre poesie di Eduardo, Einaudi (pag. 78)
Nessun commento:
Posta un commento
Grazie per aver visitato questo blog!