Penziere mieje

Penziere mieje, levàteve sti panne,

stracciàtev' 'a cammisa, e ascite annuro.

Si nun tenite n'abito sicuro,

tanta vestite che n'avit' 'a fa?

Menàteve spugliate mmiez' 'a via,

e si facite folla, cammenate.

Si sentite strillà, nun ve fermate:

nu penziero spugliato 'a folla fa.

Currite ncopp' 'a cimma 'e na muntagna,

e quanno 'e piede se sò cunzumate:

un'ànema e curaggio, e ve menate...

nzerranno ll'uocchie, primm' 'e ve menà!

Ca ve trovano annuro? Nun fa niente.

Ce sta sempe nu tizio canusciuto,

ca nun 'o ddice... ca rimmane muto...

e ca ve veste, primm' 'e v'atterrà.

[1948]

da Le poesie di Eduardo (Einaudi), pag. 5